الأديب القدير الأستاذ / الشاعر مصطفى فريد
النص : رسالة حبتم النشر بــ مجلة نبض الشعراء برقم 304
............
الله يرحمك يا امى
الرسالة الأولى لأمى منذ مرور خمس وثلاثون عاماً على رحيلها
....................
رسالة حب كتبها القلب
بكل الشوق اللى فى وجدانى
لنهر الحب واطهر قلب
لنور الفجر اللى بيرعانى
أول سطر باقولك فيه
إنك وحشانى
وحشنى الضمة لصدرك ياامه
وحشنى اللمه وصوتك لما
كنتى فى حجرك بتغنيلى
وتشاغلينى بلمسة كفك
وتضمينى لغاية قلبى
مايلمس قلبك
أسمع نبضك
لحن بيسرى جوه حشايا
يرسم نغمة صوتك آيه
يقول جوايا
نام يا ضنايا
شوق يخطفنى ادوب فى ربيعك
يهرب دمع الخوف من عينى
وبسرعه عنيكى تغطينى
اتخبا فى صدرك واحكيلك
وبضمة كفك ترقينى
ألقانى وأنا سايب إيدى
لامس احساسك بوريدى
أجرى بلهفه واقطف وردك
من فوق خدك
مين كان قدك
يا إللى الدنيا مساحة قلبك
كل حبايبك
بتوصينى ابعت سلامات
بتحملنى كتير دعوات
للمولى بحق القرآن
يغفر لك وينور قبرك
وجبينك يصبح لون قلبك
آآآآه يا امايا
بعد دعايا
لسه فى دمى بقايا حكايه
عايزه نهايه
شوفتى الجنه
زى ما حددتيها معايا
شوفتى النخل الطارح نور
والأنهار وبنات الحور
قابلتى نبينا محمد عندك
بين الصحبه وآل البيت
من سيرته قمت اتوضيت
ألف سلام وعليه صليت
لسه بتقرى فى آية الكرسي
وجزء ياسين
زى ما علمتينى فى كمك
اقراهم وأنا لسه جنين
والقلب بيسمع ويلين
حبك يا امة ولا الحواديت
مالى قلوب الناس أناشيد
بعد رحيلك زادنا حنين
والشوق مارد فينا بيكبر
وبيسألنا بدمع العين
هى الغاليه دى راحت فين
واحنا نقول له
سكنت قصر كبير فى الجنة
مفروش حنه
ومعطر فل ورياحين
ردى عليه يا امه وجاوبيه
جنبك ساكنه الحور العين
هما جيرانك
طب فى صلاتك مين بيأمك
أسماء والا خديجه فى حضنك
والا دى عيشه بتشرح صدرك
عايزك كل الحاصل عندك
تكتبهولى ياغاليه فى ردك
عارفه يا أمى
حتى فى حلمى
لسه انا حاسس طيبة قلبك
وحنان حضنك
يوم ما شقاوتى جرحت ايدى
شوفت فى عينك
نهر دموعك بيغرقنى
فى ضمة حب وحضن حرير
قلبى بلهفه عليكى يطير
وإن جيت مره فى يوم زعلتك
كنتى تسامحى بقلب كبير
فاكر لما كنت اكتب لك
حرفين اسمك بالطباشير
وانتى تلفى ورايا البيت
خايفه عليا. وقلبك ليا
بيدعى ويحلم ابقى كبير
وادينى حبيت وكبرت فى صدرك
لمن بردوا باشوفنى فى حضنك
لسه صغير. مش هاتغير
يا ام القلب الهادى الطيب
جاى قريب
ومهما تطول الغربة مابينا
جاى لك. جاى لك
جاى وشايل لك يا امه هديه
فى أول عيد بيمر عليا
وانتى بعيد. بس اكيد
فى لحظه فى ساعه فى يوم
هاوصل لك
لما المركب توصل برك
واخلع عنى عباية الغمه
لحد ما اكون ودعت الدنيا
كل آدان ابعت لك يا امه
فاتحه وآيه وبوسه وضمه
سلام وتحية.
لأعظم أم وأغلى هديه
ومسك ختام ٠
المرسل/ المخلص ابنك
والعنوان/ بميدان احسانك
شارع حبك
عطفة ودك
منزل قلبك
أول دور
..............
رسالة حب
من ديوان/ وراح الخوف
بقلم
الشاعر مصطفى فريد
تم التوثيق بـ عشاق الكلمة لتوثيق القصائد والخواطر
برقم 3172 بتاريخ 22 / 05 / 2020م
https://www.facebook.com/oshaq.elkelmaa/
رابط النص
بـ ملتقى الشعراء والمبدعين العرب
ليست هناك تعليقات:
إرسال تعليق