الشاعر القدير الأديب : مجدوب الرمى
النص : رقاص الخير
تم النشر بــ مجلة نبض الشعراء برقم 246
...................
سير سير يا رقاص الخير
زرع المحبة ما بين الناس
جري و جاري دير و دير
و ساوي لعقول لي فالراس
وضح بين و فسر تفسير
بلا حساب بلا كتاب بلا كراس
خلي كلامك رطب حرير
يكون حديثك عندو مقياس
تبقى في عينيهم كبير
في قلوبهم زرع غراس
خاوة و محبة و تيسير
و سقي عروق الإحساس
جمع شمل جماعة الخير
لي كانت فالموت و لعراس
صغيرهم يحتارم لكبير
و ديال الناس ما يتقاس
سير سير يا رقاص الخير
جري على الشر و الوسواس
جمع حسنات و خير كثير
و طرد الشيطان و لكباس
تنزل الرحمة و التيسير
لعباد تفرح و تولي لا باس
تنزل القطرة تشبع البڭرة
يثمر السبول و لغراس
تطفى لجمرة تكبر الثمرة
يزول علينا لبلا و لباس
سير سير يا رقاص الخير
زرع المحبة فلعقل و الراس
باش الغاني يتفكر الفقير
و يرجع للقلوب الإحساس
نترجاك يا رقاص الخير
كون خصيم و ولد الناس
دوز عند الصغير و لكبير
فكرهم في يوم لخلاص
ڭوليهم را لعمر قصير
ذكرهم بلكفن و البالة و الفاس.......
بقلم : مجدوب الرمى
Le 17/01/2020
تم التوثيق بـ عشاق الكلمة برقم 2902 بتاريخ
01 / 04 / 2020 م
https://www.facebook.com/oshaq.elkelmaa/
ليست هناك تعليقات:
إرسال تعليق